Nafarroako Filmotekak segida emanen die aurtengo proposamen batzuei, 2013. urtea hasteko: horietako bat Ingmar Bergman suediar zinemagileari eskainitako zikloa izanen da, beste bat INAAC Panorama esaten zaion atala eta, gainerakoan, ez dira faltako filmak banatzeko ohiko ibilbideetara aise iristen ez diren lanak. Azken proposamen horren baitan, Poloniako egungo zinemagintzaren erakustaldia da aipatzekoa, urtarrilaren 2tik 30era bitarte eginen dena, bai eta Foco Punto de Vista: las trampas del tiempo ekimena ere, hots, lau dokumental dira, laurak ere oroitzapenaren ezegonkortasunaz, oroimenaren hauskortasunaz eta ahanzturaren nahiz irudimenaren garrantziaz mintzo zaizkigunak.

Urteko azken hilabete honetan aurreko 23an hasitako zikloaren protagonista izan zen INGMAR BERGMAN zinegile suediarraren filmografiaren funtsezkoena errepasatzera dedikatuko da Nafarroako Filmoteka. Hilabete honetan zehar proiektatuko diren lau pelikulek aparteko zinegile horren existentzia frogatu zuten eta munduko jaialdi zorrotzenen eta zinezaleen onarpena jaso zuten: Fresas salvajes (1957), El manantial de la doncella (1960), Como en un espejo (1961) eta Los comulgantes (1963).

Latcho drom (Bide ona) film ezezagunak emanen dio hasiera azaroko programazioari, heldu den hilaren 6an. Ijitoen musikari eskainitako zinema-erakustaldi baten lehen emanaldia izanen da, Nafarroako Ijitoen Erakundeek antolaturik eta Kultura, Turismo eta Erakunde Harremanetako Departamentuak eta Nafarroako Filmotekak lagundurik. Horrez gain, El señor de los anillos trilogiaren arrakastaren gakoak aztertuko dira hiru saio berezitan eta Ingmar Bergman suediar zinemagileari buruzko ziklo berri bat ere abiatuko da. Ezinbesteko Zinema zikloaren barruan, bestalde, John Ford, Jacques Tati eta David Lean zinemagileen hainbat maisulan emanen dira, eta bi zikloren amaiera iritsiko da, Hiriak eta filmak eta Ana Díezen atzera begirakoa, hain zuzen; bietan ere azken hamarkada honetako hainbat lan pantailaratuko dira.

Denboraldia indar handiz hasi eta gero, Nafarroako Filmotekak bere programazio zinematografikoarekin jarraituko du; era horretan, dagoeneko hasitako ziklo batzuk luzatuko ditu (Hiriak eta Filmak), berri batzuk aurkeztuko ditu (Ana Diezen atzera begirakoa) edo lehendik ezaguna den bakarren bati helduko dio berriro ere (Ezinbesteko Zinema). Hilabete honetarako hautatutako pelikulekin, zine klasikoenetik (D. W. Griffith, Fritz Lang, Jean Renoir) hasi eta berrienera bitarteko filmak (Nafarroako zinemagileen testigantzak INAAC panorama atalean) ikusteko aukera izango dugu, tartean Zinearen Historiako film unibertsalak (M. El vampiro de Dusseldorf, El amigo americano, Blow Up) zein tokiko zinea (Tuterako Ana Diez zinemagilearen filmografia osoa) izanik.

Manuel Hidalgok zabalduko du Nafarroako Filmotekaren denboraldi berriaren programazioa, Hiriak eta filmak: ikuspegi europar bat zikloa aurkeztuko baitu. Ondoren, Berlín, sinfonía de una gran ciudad(1927) filma emanen da, pianoa zuzenean joko delarik. Hil osoan, hiru ziklotan multzokaturiko filmak pantailaratuko dira, betiere hirien, ibaien eta Bigarren Mundu Gerraren inguruan, eta horrez gain, nafar egileen hainbat lan ere emanen dira INAAC Panorama sailaren bitartez.