John Ford funtsezkoa

Sarrera: 3 €.
Filmoteka 10 emanaldirako abonoa: 20 €

Aurreko denboraldian Ingmar Bergman-i buruzko ziklo berezia antolatu genuen Nafarroako Filmotekan, eta haren filmografiako funtsezko hamar lan eman genituen. Aurten John Ford aukeratu dugu, 2013-2014 denboraldian antzeko zerbait egiteko. “Funtsezko” abizena duen programazio hau hurrengo urteetan ere antolatzen jarraitzea espero dugu, zinema arloan pertsona ospetsu ugari baitago mundu osoan.

Aurten 40 urte dira Ford hil zela, eta 2014an, programazioa amaitzen denean, jaio zela 140 urte beteko dira. Aitzakia hori ez bada ere, zenbaki biribil horiek justifikatzen dute, nolabait, zinemagintzako garai guztietako pertsona garrantzitsuenetako baten inguruan ziklo bat antolatzea. Zinema-zuzendari handi ia guztiek aitortu dute, lantzen duten generoa dena delakoa ere, John Ford-en filmek garrantzi handia izan dutela zinematografiaren hizkuntza ikasteko haien prozesuan. Zuzendariez gain, ordea, Ford-en lana beste hainbatek ere aintzatetsi du: batetik, Hollywood-eko Zinema Akademiak, zuzendari onenaren lau Oskar sari lortu baitzituen (hori lortu duen zinemagile bakarra da); bestetik, ikusleek, haren filmetako heroiak zinemetan txaloka adoretzeaz gain, filmak berak ere txalotzen baitzituzten; eta azkenik, ekoizleek, harengan uste osoa jarri zutelako, 140 pelikula zuzentzeraino.

Zinemazale guztiek berrikusi beharko lukete John Ford-en filmografia bizitzan behin, gutxienez. Ezin dira bere lan guztiak ikusi, batzuk, zinema mutuaren garaian egin zirenez, desagertu egin direlako; baina zinemaren historiako klasiko bihurtu direnak behintzat ikusi beharra daude. John Ford-ek era horretako asko dauzka, eta batzuk gure pantaila handian, dagokien lekuan, ikusi ahal izango ditugu datozen asteetan.