Oscar Niemeyer. La vida es un soplo

Oscar Niemeyer (Río de Janeiro, 1907), ehun urteko brasildar arkitektoa, XX. mendeko garrantzitsuenetarikoa da (Pritzker Saria 1988an). Modu informalean kontatuko du haren bizitza eta laneko ibilbidea: lehenengo aukerak, Le Corbusier edo Lúcio Costa herrikidea bezalako mailakoen ondoan egindako lanak, lehen proiektu arkitektoniko nagusiak sortzeko modua (New Yorkeko Nazio Batuen eraikina, Brasiliako hiri modernoa, Niteróiko arte garaikidearen museoa, Argelgo Unibertsitatea, alderdi Komunistak Parisen duen egoitza,…), kezka sozialak, katolizismotik komunismorako bidea, emakumearekiko maitasuna eta jaioterriarekiko lotura estua. Lehen pertsonan kontatutako filma izango da, irudi ezezagunekin eta honako hauen lekukotasunekin: José Saramago, Eric Hobsbawn, Eduardo Galeano eta Nelson Pereira Dos Santos. Edertasuna harrapatu eta eraikin harrigarriekin harritu nahia etengabe ikusten da haren obran. Niemeyer-en ustez, ez da funtzionaltasunarekin obsesionatu behar; garrantzitsuena da berritzea, harritzea eta irtenbide ezberdinak eskaintzea. Avilesko Nazioarteko Zentro Kulturalaren diseinatzailea da, 2011n inauguratua, Espainian egin duen lehen eraikina.

Aurkezpena: María Urmeneta, arkitektoa