Haizeak eramana

   Georgia, 1861. Scarlett O'Hara (Vivien Leigh) Estatu Batuetako hegoaldean bizi da, Tara izeneko etxe dotorean; eskualdeko emakume eder, apetatsu eta berekoiena da. Ashleyrekin (Leslie Howard) dago maiteminduta, baina hura lehengusinari, Melanie (Olivia de Havilland) ezti eta bihozberari, eman dio ezkon-hitza. Sezesio-gerra (1861-1865) piztu aurreko azken festan, Scarlettek Rhett Butler (Clark Gable) ezagutuko du. Butler gizon ziniko eta ziratsa da, bizizale hantuste eta abenturazalea, bere buruan baino pentsatzen ez duen horietakoa, eta ez dauka gatazkan parte hartzeko asmorik. Aberastea eta Scarlett ederraren bihotza bereganatzea da haren helburu bakarra.

      Haizeak eramana bost zuzendari desberdinek filmatu zuten: B. Reeves Eason, Sam Wood, George Cukor, W. C. Menzies eta Victor Flemingek, hain zuzen ere. Hori, bigarren mailako unitateko zuzendariekin grabatutako eszenak kontuan hartu gabe; eta era horretako eszena asko egin zituzten, filmazioan izandako gorabeheren ondorioz. Diote filma George Cukorrek zuzendu behar zuela (Vivien Leigh hartzearen alde agertu zen), baina, zurrumurruen arabera, Clark Gablek ordezkatzea eskatu zuela, Cukorrek (homosexuala zen) Gablen iraganeko hainbat xehetasun zekizkielako eta ez zelako eroso sentitzen harekin lanean. Diote, baita ere, Vivien oscarra jaso ondoren bainugelan negarrez aritu zela, momentu hori George Cukorrekin ezin konpartitzeak tristatuta.

      Errekorren filma da: ikusle gehien izan zituena, 10 oscar irabazi zituena, gehien iraun zuena... Funtsean, bizitzan gutxienez behin ikusteko pelikula bat da. Oraingoa abagune egokia da, estreinatu zela 75 urte bete direlako eta ederra izaten jarraitzen duelako.