Nafarroako Liburutegi eta Filmotekaren eraikina

Nafarroako Liburutegia eta Filmoteka 2011ko martxoaren 1ean zabaldu zen eta Iruñeko Mendebaldea auzoan dago.

Filmen artxiboa, areto tekniko bat eta proiekzio-gela bat daude eraikinean, baita zinemagintzari buruzko funts bibliografikoa eta ikus-entzunezkoen funtsa ere, libre eskuratzeko moduan eta gordailuetan. Funtsa egunez egun handitzen ari da eta Nafarroako Liburutegien Sarearen katalogoaren bidez ikus daiteke edukiak erabilgarri ote dauden, haietako asko eskuragarri daude eta.

Hona hemen zein diren Filmotekaren eginkizunik aipagarrienak:

• Berreskuratu, babestu, zaharberritu, dokumentatu eta katalogatzea hala ondare zinematografikoa, nola zinemagintzari loturiko bertze zeinahi elementu.
• Zaindu eta begiratzea euskarri orotako filmen eta ikus-entzunezko obren artxiboa eta, oro har, bere funts zinematografiko guztiak, bai bere jabetzakoak, bai dohaintza, jaraunspen, legatu edo gordailu boluntarioen bidezkoak edo Legezko Gordailuagatik ezinbertzean entregatu zaizkionak.
• Ondare zinematografikoaren zabalkuntza lana, zikloak eta saioak antolatuz edo zinemagintzarekin loturiko bertzelako adierazpenen bitartez, irabazi asmorik gabe betiere; edizio lana, zeinahi euskarritan, eta zinemaren kultura zabaltzeko egokitzat jotzen diren jarduerak oro.
• Azterlan eta ikerketak sustatzea, Nafarroako zinemaren filmografiari buruzkoak bultzatuz batez ere.
• Bertze autonomia erkidegoetako zinematekekin elkarlanean aritzea, baita interesa duen bertze zeinahi erakunderekin ere.

Filmen artxiboaren kudeaketak helburu du Nafarroarekin zerikusia duten filmak eta ikus-entzunezko lanak gorde, deskribatu eta zabaltzea, baita bertze zeinahi material, ekipamendu eta elementu ere, baldin eta interesgarriak badira zinemaren eta ikus-entzunezkoen alorra oro har aztertzeko eta zehazki Nafarroakoa.

Filmen funtsean Nafarroako Gobernuaren jabetzakoak diren material zinematografikoak biltzen dira, hainbat bidetatik eskuratuak: erosiak, dohaintzan hartuak edo ikus-entzunezkoen alorreko laguntza publikoen onuradunek ezinbertzean emandakoak; baita partikularrek eta bertze entitate batzuek gordailuan emandako materialak ere. Funts horien artean nabarmentzekoak dira honako hauengandik jasotakoak: Antonio José Ruiz, Enrique Soler, Adrián Martínez "Hamsi", Golem, Saide, Cine Club Lux, Jesús Baztán, Javier Garreta, AlfonsoVerdoy, Mirentxu Purroy edo Miguel Urabayen. Eta aipatzekoa da, orobat, Canal 4 Navarra-tik etorritako telebista-artxiboa.

Zabalkunde zinematografikoaren arloari begira, eraikinean bada 176 eserlekuko proiekzio-gela bat. Astean 3 saio antolatzen dira bertan (asteazken, ortzegun eta ortziraletan) gehienbat film klasikoen eta Nafarroari loturiko filmen emanaldietarako.

Filmen emanaldiez gain, Filmotekak bertzelako jarduerak ere antolatzen ditu, hala nola Gazteentzako Zinema-tailerra, non super 8mm-tan filmaturiko filmak sortzen diren, Programazioaren barnean ematen direnak gero, edo kartelen edo bertzelako gauzakien erakusketak.