Batez ere antzerkiari egon zen lotuta, baina film askotan ere parte hartu zuen Osinagak. Madrilen kantatzen ikasi zuen. Hasierako urteetan zarzueletan lan egin zuen eta beranduago komedia musikalei, aldizkariei (Ven y ven … al Eslava (1958) arrakastatsua, adibidez, Tony Leblanc-ekin batera) eta komedia dramatikoei ekin zien. Bere ibilbideko arrakastarik handiena Sé infiel y no mires con quién (1972-1984) antzezlanarekin jaso zuen, 10.000 aldiz antzeztu baitzuten.

Amor bajo cero (1960) lanarekin sartu zen zinemaren munduan eta Sara Montiel (La reina del Chantecler, 1962) eta Rocio Durcal (Tengo 17 años, 1964) bezalako izarrekin lan egin zuen. TVE telebista kateko espazio dramatikoek ospetsu egin zuten arren, zineman egin zuen ibilbidea ia erabat bukatu zen 70. hamarkadan, destapearen urteetako hainbat komedia pikaro grabatu eta gero.

1986. urtean TVE kateko Todo queda en casa saioa aurkeztu zuen. Saio hark bi familia aurrez aurre jartzen zituen eta 1986ko ekainetik 1987ko otsaila arte emititu zen.

2011. urtean Pepe Isbert Antzerki Sari Nazionala jaso zuen Asociación Nacional de Amigos de los Teatros de España (AMITE) elkartearen eskutik. Erakunde pribatu batek Espainian eskaintzen duen sari nagusia da eta bozka herrikoia egin eta gero erabakitzen dute sariduna. 2011ko azaroaren 11ean izan zen sari banaketa Albaceteko Circo Antzokian.