Haurrek aurtengoan beste leku bat izanen dute oporrez gozatzeko: Nafarroako Filmotekak, izan ere, lau saio antolatu ditu urtarrilaren 2tik 5era bitarte. Batetik, gaztelaniazko hiru film klasiko emanen dira, eta hiruretan ere irudi erreala animazio-teknikekin nahasita daude; bestetik, euskarazko animazio-film bat eskainiko da. Saioak goizeko 11:30ean hasiko dira.

Nafarroako Filmotekak Nafarroa Filmotekako Artxiboetan izeneko zikloari helduko dio maiatzaren 5ean, Nafarroarekin zerikusia duten pelikulak ezagutzera emateko, guztiak ere Nafarroako Filmotekako funtsetan edo beste filmoteka batzuetakoetan gordeak daudenak. Holako film sortak urte osoan emanen dira eta, oraingo honetan, hasteko, ikus-entzunezko hiru lan emanen dira, hirurak ere Iruña gai harturik: Pamplona, 1928; Pamplona; eta, Rincones y nostalgias de Pamplona I. Sarrera doakoa izanen da, eta saioa 20:00etan hasiko da.

Nafarroako Filmotekak François Truffaut frantses zinemagilearen film adierazgarrienetako batzuk emanen ditu, maiatzean eta ekainean eginen den zinema zikloaren barruan. François Truffaut. Zinema-desioa, izan ere, maiatzaren 6an hasiko da, guztira zortzi film emanen dira, eta lehen saioan Los cuatrocientos golpes egonen da ikusgai, hau da, zuzendariaren lehen film luzea. Saio guztiak ostiraletan eskainiko dira, 20:00etatik aurrera, jatorrizko bertsioan, hau da, frantsesez, eta azpitituluak gaztelaniaz jarrita. Emanaldiez gain, Carlos Losilla zinema-kritikariak Truffauten zinemari buruzko mintzaldi bat eskainiko du maiatzaren 12an.